Hoi zäme
Noch Nelson send mer zu de Golden Bay, gnauer Takaka, gfahre. Das gränzt grad nördlich a dä Abel Tasman National Park. Wells eigentli mehrheitlich nor grägnet hät send mer chli i dä härzige Kaffiis vo däm Hippie-Dörfli ghocket und händ eus met DVDs öber Wasser ghalte. Einzig nännenswerte Usflug: Pupu-Springs - das esch die gröschti Süesswasser-Quelle vo Neuseeland und beförderet unglaublich gueti Wasserqualität an Tag.
Nächscht Station esch denn Maharau gsi. Ufem Wäg dethi händ mer aber s'guete Wätter för en wiitere Usflug gnutzt und send zum Harwood Hole gwanderet. Das esch Neuseelands tüüfschti senkrächti Höhleschacht (183 Meter). Zum Glöck hät eus s'guete Wätter nöd em Stich gloh und so händ mer dänn via Maharau eusi zwoitägig Tracking-Tour dorch dä Abel Tasman Nationalpark gstarted. Die öppe 20 km-langi Wanderig hät sech glohnt - siehe Fotos. Öbernachted händ mer imene Masseschlag met durchschnittlicher Schnarchlerei 
.
Mittlerwiile send mer weder zrogg in Nelson, nutzed mol weder s'gratis Internet i dä öffentliche Bibliothek und freued eus uf än wiiteri Nacht i eusem ruige Spaceship 
.
Bis zum nächschte mol,
Mejo
Eure Fotos muss man mehrfach anschauen um alles mit zu kriegen. Mit "alles" meine ich auch die Titel! Was heisst denn "ates Ehepaar" ????????????
Sonja