Big Island

March 4, 2010 - Kona, Hawaii, United States

Aloha!

Dä Start vo eusem Bsuech vo dä gröschte Insle vo Hawaii esch prägt gsi dorch d'Warterei uf dä Tsunami, wo dänn schlussendli "nor" d'Ostköschte betroffe hät, nöd aber d'Westköschte wo mer eus befunde händ. Trotzdem händ die lokale Behörde vel Vorsicht walte loh, sodass mer dä ganz Tag mehrheitlich met warte verbrocht händ.

Am nächschte Tag send mer go s'Dorf aluege, händ e Bierbrauerei bsuech (inkl. Bierdegustation) und send go schnorchle. Näbed velne bontä Fisch esch eus no ä grossi Schildkrot öber dä Wäg glofe bzw. gschwommä ;).

Met vel Elan händ mer en Tag spöter ä Wanderig im Volcano National Park gmacht. Näbed eme abküehlte Lavasee, send mer au no go dampfendi Erdspalte, usträtendi Sulphurgas und en emmerno aktive Krater go aluege. Ächt iidröcklich.

Dorch dä Tipp vomene nätte ältere Bostoner-Ehepaar händ mer eus dänn uf dä Wäg zum Mauna Kea gmacht. En 4000 Meter hohe schlofende Vulkan. Riesig und osserirdisch, das beschriebt am beschte, was mer uf eusem Wäg zom Gipfel gseh händ. Lueged doch eifach d'Bilder a und remember - mer send met eusem 2-Rad-Atrieb-Auto bis ganz ufe kroche :D.

Eusä lätschti volli Tag uf dä Big Island händ mer wiederum mit schnorchle verbrocht... und zwar i dä Bucht wo dä Captain Cook vo de Hawaiianische Uriwohner umbrocht worde esch. Dä Fisch schiint das nüt usgmacht zha, unglaublich wie vel verschiednigi Meeresbewohner die Bucht beheimatet. Nocheme abschlüssende Bsuech vonere Kaffeeplantage verbringe mer jetzt no en gmüetliche Obe i eusere Suite ;) bevors morn weder zrogg uf Waikiki goht.

Cu soon,
Mejo


Pictures

Aloha on Big Island Hawai'i
Tsunami Schaulustige
Hawai'i Style
Bubba Gump Shrimp Company
 
 
Fuzzy Travel · Next »
Create blog · Login